امتى نشيل الطحال؟
- هل كل طحال كبير لازم يتشال؟ الإجابة، لأ طبعا.
هل الانسان يقدر يعيش من غير الطحال؟
- الإجابه، أيوه ينفع، لكن بيكون فيه بعض مضاعفات لإزالة الطحال مثل:
- بيكون الجسم معرض للعدوى ببعض أنواع البكتريا وعشان كده فيه تطعيمات تعويضية بياخدها المريض قبل أو بعد العمليه وبتتكرر كل فترة.
- بيحصل زيادة ف عدد الصفائح الدموية، وأحيانا تكون زيادة كبيرة ممكن تعمل جلطات وساعتها تحتاج إضافة بعض الأدوية.
لذلك قرار استئصال الطحال لازم يكون ليه أسباب قوية وذلك لأن الطحال عضو مهم جدا للجسم وله وظايف كثيرة:
- يقوم بفلترة الدم من الميكروبات والبكتريا الضارة عن طريق خلايا مناعية.
- بيساعد فى عمل جهاز المناعة، لأنه ينتج أجسام مضادة بتحمى الجسم.
- يعتبر الطحال مخزن لخلايا الدم وكذلك يساعد فى تجديد خلايا الدم لأنه يتخلص من الخلايا القديمه بعد ما يقوم النخاع بإنتاج خلايا جديدة قوية.
- الطحال ممكن يتضخم ويكبر لأسباب كتيرة، بعضها أسباب حميدة مثل، عدوى بالبلهاريسيا، الإصابة ببعض الفيروسات، أمراض مناعية أو بعض أنواع الأنيميا الوراثية مثل أنيميا البحر الأبيض المتوسط وبعض أسباب تضخم الطحال بتكون نتيجه وجود أورام خبيثة.
- لو هنشيل الطحال لازم يكون لأسباب محددة وقوية مثل حدوث تمزق وتهتك نتيجة حادث أو خبطة، تكسير شديد لخلايا الدم مسبب أنيميا شديدة بتحتاج نقل دم متكرر أو نقص صفائح غير مستجيب للأدوية، بعض حالات الأورام الخبيثة، وفيه أسباب تانية كتيرة بتختلف حسب سن وحالة المريض وسبب تصخم الطحال، عشان كده لازم تتناقش مع طبيبك قبل قرار إزالة الطحال وتعرف الأسباب.
دمتم بصحة وعافية....
د/منى محروس عبد اللطيف
استشارى أمراض الدم وزرع النخاع
مدرس الأمراض الباطنة وأمراض الدم بكلية طب طنطا