• مش أى حد مفاصله بتوجعه يبقى عنده التهاب في المفاصل ..
• مش أى حد عنده التهاب مفاصل يبقى نقوله عندك روماتيزم أو روماتويد...
• التهاب المفاصل يعنى يكون فيها تورم وآلام واحمرار أحيانا وصعوبة ف الحركة وده ممكن يحصل فى أى مفصل حتى أصابع اليدين.
• لأن فيه أسباب كتيرة لالتهابات المفاصل، زى النقرس أو الخشونة أو مرض السكر غير المنتظم أو بسبب عدوى فيروسية أو بكتيرية  فى الدم وطبعا الأمراض المناعية زى الذئبة الحمراء والروماتويد وكذلك بعض أمراض الدم زى أنيميا البحر المتوسط والأنيميا المنجلية وغيرها. 
• وكل واحد فيهم بيختلف فى تشخيصه وعلاجه.
  

فيه علامات خطر لازم ناخد بالنا منها فى التهاب المفاصل زى:

• لو فيه تيبس أو كلبشة فى الصباح وبالذات مفاصل اليد - بتستمر أكتر من نص ساعه.
•  لو مفاصلك بتورم وفيها وجع جامد أو احمرار.
•  لو فيه ارتفاع فى درجة الحرارة بدون سبب واضح.
•  لو بيتكررعليك أعراض مصاحبة زى قرح بالفم أو الجهاز التناسلي أو تكرار التهابات ف العين واحمرار بدون سبب واضح لطبيب العيون.

التشخيص الصحيح والعلاج المبكر هيحميك من مضاعفات كتيرة.
دمتم بخير....

د/ منى محروس عبداللطيف
استشاري ومدرس الأمراض الباطنة وأمراض وأورام الدم وزرع النخاع بكلية الطب جامعة طنطا